Tereqqi.tk

Nazirlər Nyu-Yorkda növbəti dəfə bir araya gəldilər

Sahib — Sat, 27 Sep 2008 08:42:22 +0000

Ali Babacanın iştirakı ilə Azərbaycan və Ermənistanın xarici işlər nazirləri Dağlıq Qarabağ münaqişəsi ətrafında müzakirələr aparıblar.Dünən Azərbaycan və Ermənistan xarici işlər nazirləri Elmar Məmmədyarov və Edvard Nalbandyan Nyu-Yorkda növbəti dəfə bir araya gəldilər. Azərbaycan XİN-in mətbuat katibi Xəzər İbrahimin qəzetimizə telefonla verdiyi məlumata görə,

nazirlər əvvəlcə ATƏT Minsk Qrupunun həmsədrlərinin iştirakı ilə bir araya gəliblər.Bu görüşdə Dağlıq Qarabağ münaqişəsinin aradan qaldırılması ilə bağlı fikir mübadiləsi aparılıb. “Görüşdə tərəflər qeyd ediblər ki, bölgədə son dövrlərdə baş verən hadisələr Dağlıq Qarabağ münaqişəsinin həlli ilə bağlı danışıqların intensivləşdirilməsini zəruri edir”, - deyə X. İbrahim söylədi.
Sonra nazirlər arasında təkbətək görüş keçirilib. Daha sonra isə Türkiyənin xarici işlər naziri Ali Babacan əvvəlcə ermənistanlı həmkarı Edvard Nalbandyanla bir araya gəlib. Yarım saat davam edən Babacan-Nalbandyan görüşündən dərhal sonra Elmar Məmmədyarovun da iştirakı ilə görüş üçtərəfli formatda yenidən davam etdirilib. Son görüşmə isə 25 dəqiqə çəkib. Görüşdən sonra hər üç nazir jurnalistlər qarşısında birgə brifinq veriblər.
Ali Babacan: “Bu gün (dünən-red.) Ermənistan və Azərbaycan xarici işlər nazirləri ilə birlikdə regional mövzular ətrafında müzakirələr apardıq. Qafqaz bölgəsinin böyük potensiala malik olduğuna inanırıq. Əgər Qafqazda sülh və sabitliyi təmin edə bilsək, çox şeyə nail ola biləcəyimizə inanırıq. Bu, xalqlarımızın rifahı üçün lazımdır. Bundan əlavə, bu, geopolitik vəziyyətə də müsbət təsir edəcək”, - deyib və çıxışında “Bəzi spesifik regional məsələləri də müzakirə etməyə başladıq”, - cümləsinə yer verib. A. Babacan onu da deyib ki, görüşdə tərəflər daha yaxşı bir siyasi dialoq anlayışı formalaşdırmaq üçün üçtərəfli görüşlərin davam etdirilməsi barədə razılığa gəliblər.
Elmar Məmmədyarov isə regionun riskli bölgə olmasına diqqəti çəkib: “Hamımız bu regionda risklərin və çətinliklərin olduğunun fərqindəyik. Ona görə də mövcud problemlər uyğun bir şəkildə həll olunmalıdır”.
Təşəbbüsünə görə Ali Babacana təşəkkür edən Edvard Nalbandyan: “Türkiyənin Qafqaz Platforumu təklifini məmnuniyyətlə qarşılayırıq”, - deyib.
Jurnalistlərin növbəti görüşün nə vaxt baş tutacağı barədə suallarına tərəflər əvvəlcə cavab verməyiblər. Ancaq suallar israrla verilincə Edvard Nalbandyan: “Çox yaxında”, - cavabını verib.

Serj Sarkisyan:"İlham Əliyevə təklif etdim ki, Qarabağa investisiya yatırsınlar"

Sahib — Mon, 22 Sep 2008 09:11:52 +0000

Ermənistan prezidenti Serj Sarkisyan deyib ki, əgər Azərbaycan Dağlıq Qarabağa investisiya qoymağa çalışsa, o zaman bəlkə oranın əhalisi Azərbaycanın tərkibində qalmaq perspektivinə münasibətini dəyişər.
Bunları Ermənistan prezidenti bir qrup xarici jurnalistlə Yerevanda keçirdiyi görüşdə bildirib.

BBC-nin Moskva müxbiri Eldar İsmayılzadə də həmin səfərdə iştirak edir və görüş zamanı Serj Sarkisyana Dağlıq Qarabağın statusu ilə bağlı bir neçə sual verib.

- Güzəştlərin hər iki tərəfdən edilməsi barədə çağırışlar edilir. Ermənistanda bu güzəştlərin yuxarı həddi hansıdır? Ermənistan nədə güzəştə gedə bilməz? Ümumiyyətlə, Ermənistan Dağlıq Qarabağın Azərbaycanın tərkibində, hansı formadasa qalması ideyası ilə barışa bilərmi?

- Bu istiqamət haqqında biz çoxdan, ən azı 14 il bundan əvvəl elan etmişdik. O zaman ki, atəşkəs istəyirdik və daha bir neçə il ondan öncə bu barədə danışmışdıq. Və bu istiqamət odur ki, Dağlıq Qarabağ xalqının öz müqəddəratını həll etmək hüququ tanınmalıdır. Məsələ ondadır ki, Dağlıq Qarabağ xalqı min illər bu ərazidə yaşayıb və indi elə şərait yaradılmalıdır ki, bu xalqın həmin ərazidə təhlükəsiz yaşayışını davam etdirmək imkanı olsun.
O dövr, Qarabağın Azərbaycanın tərkibində olduğu Sovet dövrü göstərmişdir ki, Azərbaycanın tərkibində Dağlıq Qarabağın təhlükəsiz yaşaması mümkün deyil.
O ki qaldı nəzəri varianta - yəni, Qarabağ hər hansı şəkildə Azərbaycanın tərkibində ola bilər, ya yox - əlbəttə, mən cavab verə bilərəm ki, bunu qarabağlıların rəyini referendum vasitəsilə öyrənməklə müəyyən etmək olar və sair. Lakin mən əminəm ki, heç olmasa yaxın vaxtlarda istənilən referendum yalnız və yalnız bir nəticəni göstərəcək - qarabağlılar Azərbaycandan kənarda olmağı istəyəcəklər.
Mən Azərbaycan prezidenti İlham Əliyevə təklif etmişəm ki, o, mövcud dövrdə Qarabağın xoş guzəranı, təhlükəsiz yaşayışı və gələcəyində azərbaycanlıların ciddi maraqlı olduqlarını göstərmək üçün Qarabağa investisiyalar qoymağa çalışsın. Bəlkə ondan sonra qarabağlılar referendum zamanı Azərbaycanın tərkibində yaşamaq istədiklərini bildirdilər. Başqa yol yoxdur. Əgər bir gün möcüzə baş versə və Qarabağ Azərbaycanın tərkibinə düşsə, zənnimcə, çox qısa bir zaman ərzində Qarabağda bir nəfər də olsun erməni qalmaz.

- Gürcüstan öz seçimini Qərbin xeyrinə edib. Bəs Ermənistan necə? Gürcüstanda baş verən son hadisələrə Ermənistanın münasibəti necədir?

- Biz öz xarici siyasi kursumuzdan danışarkən, dəfələrlə NATO-ya üzv olmaq fikrində olmadığımızı bəyan etmişik. Biz Avropa İttifaqının Qonşuluq Siyasətinə dair Tədbirlər Planını həyata keçiririk. Bu bizim üçün çox mühüm bir istiqamətdir.
Amma sadəcə "üzv olmaq istəyirəm" demək bəs deyil. Belə olsaydı, Gürcüstan çoxdan Aİ-nin üzvü olmuşdu. Biz heç zaman Gürcüstanı bu istiqaməti seçməsinə görə tənqid etməmişik. Bir qonşu kimi, bizim bir-birimiz qarşısında öhdəliklərimiz var.
Gürcüstan GUAM üzvüdür, Ermənistan isə MDB Kollektiv Təhlükəsizlik Sazişinin üzvüdür. Gürcüstan NATO üzvlüyünə can atır, biz yox. Gürcüstan yalnız ərazi bütövlüyü prinsipini tanıyır. Biz isə xalqların öz müqəddəratını müəyyən etmək hüququnu onunla bərabər tuturuq. Digər sözlə, elə sahələr var ki, orada qonşu dövlətlərin maraqları bir-birinə zidd ola bilər. Lakin əsası budur ki, bu bizə bir-birimizə olan qonşuluq öhdəliklərini yerinə yetirməyə mane olmasın. Fikrimcə, bunu etmək mümkündür və biz əlimizdən gələni edəcəyik ki, aramızda normal əməkdaşlıq münasibətlərini davam etdirək. Bu sizə təəccüblü gələ bilər ki, Ermənistan həmişə xalqların öz müqəddəratını müəyyən etmək hüququndan danışıb, amma Kosovo, C. Osetiya və Abxaziyanın müstəqilliyini tanımır... Lakin bizim üçün bu seçim aydındır. Nə qədər ki, biz Dağlıq Qarabağın müstəqilliyini tanımamışıq, başqa yerləri də tanıya bilmərik. Bunun isə səbəbi odur ki, biz Azərbaycanla danışıq prosesindəyik və hər iki tərəf üçün məqbul çözüm yolu axtarırırıq. Yadınıza salmaq istərdim ki, Kosovo və digər hallarda müstəqillik artıq başqa yol qalmayanda elan edilib. Ermənistanda hiss edəndə ki, artıq başqa yol qalmayıb, onda Dağlıq Qarabağı tanıyacaq.

“Dağlıq Qarabağ probleminin həlli üzərində ciddi çalışırıq”

Sahib — Fri, 19 Sep 2008 08:19:04 +0000

“Biz Rusiyanın bəzi arxaik “nüfuz dairəsi zonalarında” suveren millət və xalqların daxili işlərinə istənilən müdaxilə cəhdlərinə müqavimət göstərəcəyik”.Bu fikirləri ABŞ-ın dövlət katibi Kondoliza Rays bəyan edib. Onun sözlərinə görə, ABŞ və Avropa İttifaqı Qafqaz ölkələri ilə əlaqələri möhkəmlətmək siyasəti yürüdür:

“Biz Dağlıq Qarabağ kimi regional problemlərin həlli üzərində ciddi çalışır, həmçinin Türkiyə kimi dostlarımız və müttəfiqlərimizlə Qafqazda əməkdaşlığın əsaslarını formalaşdırmaq üzərində işləyirik”. Kondoliza Rays qeyd edib ki, ABŞ və Avropa İttifaqı energetika sahəsində Azərbaycan, Gürcüstan, Türkiyə və digər Xəzəryanı ölkələrlə əməkdaşlığı genişləndirmək niyyətindədir.

D.Qarabağ münaqişəsinin nizamlanması üçün “qızıl imkan” varmiş.

Sahib — Mon, 30 Jun 2008 09:42:05 +0000

"Mən dörd ildən artıq ATƏT-in Minsk Qrupunun Dağlıq Qarabağ münaqişəsinin nizamlanması istiqamətində cəhdlərinə dəstək verməklə məşğul olmuşam".bu fikirləri ATƏT Parlament Assambleyasının prezidenti Qoran Lenmarker qurumun yay sessiyasında çıxışında bildirib. O bildirib ki, bu münaqişənin nizamlanması üçün "qızıl imkan" olub:

"Mən belə bir "qızıl imkan"ın olduğunu görürdüm, amma təəssüf ki, hələlik bu imkan sülh sazişinin imzalanması ilə nəticələnməyib. Hazırda hər iki ölkə üçün vəziyyəti dəyişmək, Dağlıq Qarabağ münaqişəsinin həlli prosesini davam etdirmək üçün gözəl şansı var. Əgər Azərbaycan və Ermənistanın siyasi iradəsi olsa, saziş imzalamaq mümkündür. Geriyə deyil, gələcəyə baxmaq vacibdir. Regionda yeni müharibə mümkün deyil, bu barədə düşünmək belə istəmirəm və bu təhlükədən qaçmaq lazımdır".

Azərbaycandan gedən ermənilərə 5 mln. ABŞ dolları maddi ziyan dəyib.

Sahib — Sat, 21 Jun 2008 07:42:43 +0000

Elmira Süleymanova: «Ermənistanın Dağlıq Qarabağ münaqişəsi zamanı verdiyi maddi itki ilə Azərbaycanın itkisi müqayisə edilməzdir»bunu Ermənistan Miqrasiya Xidmətinin Dağıq Qarabağ münaqişəsi nəticəsində Azərbaycandan gedən ermənilərə 5 mln. ABŞ dolları maddi ziyan dəyməsi barədə yaydığı məlumata münasibət bildirən Azərbaycan Ombudsman Aparatının rəhbəri Elmira Süleymanova bildirib.

E.Süleymanova qeyd edib ki, Azərbaycandan gedən ermənilər öz evlərini satıb gedə bilmək imkanına malik olublar, lakin azərbaycanlı qaçqınların belə bir imkanı olmayıb. «Azərbaycana 60 mlrd. dollar həcmində maddi ziyan dəyib. Bu, hələ maddi itkidir, mənəvi itki isə sözsüz ki daha böyükdür», - deyə E.Süleymanova vurğulayıb.

APA